Жива и сребро пронајдени во одводниот канал кај Таор од кој во ноември извираше бела пена
По испитувањето на мострите земени од површинската вода во одводниот канал кај селото Таор, Институтот за јавно здравје потврди присуство на жива и сребро, објави СДК. Испитувањето беше извршено по барање на АД „Водостопанство“ и следеше по појавата на бела пена што на 21 ноември минатата година извираше од истиот канал.
Од Државниот инспекторат за животна средина изјавија дека е забележан зголемен број на термотолерантни колиформни бактерии, зголемени концентрации на жива и нитрити како азот, како и присуство на сребро. Од ИЈЗ ја препорачаа континуирана контрола на нивото на жива, која претставува опасност за рибниот фонд и за здравјето на луѓето доколку се консумира загадена риба.
Инспекторатот посочи дека во каналот завршуваат отпадните води од општините Гази Баба, Илинден, Арачиново и Петровец, а Скопје сè уште нема пречистителна станица за третман на отпадни води.
Според евиденцијата на Инспекторатот, инцидентот е поврзан со активирањето на пумпите за отпадни води од системот на Скопско Поле, по што визуелно беше утврдено можно сериозно хемиско загадување на Вардар.
