Жител на Трубарево возел пијан, без возачка и предизвикал сообраќајка и повредени осумесечни бебиња и три други лица
Основното јавно обвинителство Скопје поведе постапка против 57-годишен жител на село Трубарево за кривично дело „Загрозување на безбедноста во сообраќајот“ по член 297 став 1 од Кривичниот законик.
Според обвинението, на 8 август, на локалниот пат меѓу селата Петровец и Долно Коњари, осомничениот управувал автомобил „Мерцедес“ со истечена важност на сообраќајната дозвола, под дејство на алкохол и со брзина несоодветна на условите на патот.
Во еден момент изгубил контрола над возилото, навлегол во лентата за спротивен сообраќај и со предниот лев страничен дел удрил во автомобил „Шкода“.
Од судирот полесни повреди добиле возачот и четворица сопатници од „Шкодата“, меѓу кои и две осуммесечни бебиња. По укажаната лекарска помош сите се пуштени на домашно лекување.
Јавниот обвинител до судијата на претходна постапка предложил мерки на претпазливост за осомничениот – забрана за напуштање на живеалиштето, обврска за редовно јавување во судот и привремено одземање на возачката дозвола од Б-категорија, како и забрана за нејзино издавање.
