„Жикол“ и „ВТЕ“ тријат раце, префрлени првите 10 милиони евра за пречистителна станица во Скопје
На сметката на Министерството за животна средина се префрлени првите 10 милиони евра, односно 603.500.000 денари за проектот за изградба на пречистителната станица за отпадни води кој треба на крајот да чини 200 милиони евра. Трансакцијата минатата недела ја најави и министерот за финансии Фатмир Бесими, а парите се легнати на последниот работен ден од 2023.
Според она што беше најавено претходно, парите треба да бидат префрлени кон скопски „Водовод“, а од таму да се распоредат кон германско-македонскиот конзорциум „ВТЕ Васертехник“ и „Жикол“ со кои беше потпишан договор во април годинава. Пред да се потпише договорот, требаше да мине долго време за усогласувањето на релација Град Скопје – Водовод – Министерство за животна средина.
Капиталниот проект е вреден 200 милиони евра, од кои 136 милиони евра се кредит од Европската инвестициска банка, а 70 милиони евра се неповратен грант од Европската унија.
Постапката за пречистителна станица за отпадни води започна во декември 2019. Тендерот беше распишан во јуни 2020 и тогаш беше кажано дека во 2025 Скопје ќе ја добие пречистителната станица, со што трајно ќе се реши проблемот на отпадни води од кои најмногу страда реката Вардар.
Во меѓувреме поради локалните избори постапката беше закочена и со месеци немаше избор на фирмата за надзор и фирмата изведувач, иако бодувањата беа направени и тие автоматски го покажаа победникот на тендерот.
Пречистителната станица за отпадни води ќе се простира на површина од 13 хектари, во општина Гази Баба, на левиот брег на реката Вардар, во областа Трубарево. Откако ќе биде пуштена во функција, ќе може безбедно да ја третира и прочистува водата за 540.000 жители. Третираната вода ќе има врвен квалитет, согласно европските стандарди.Ќе се намали и протекувањето, па 70 проценти од искористената вода ќе може да се употреби, што е од суштинско значење во период на климатски промени и зголемување на урбаното население. Тоа ќе помогне и водата од реката Вардар да биде помалку загадена.
Изградбата на пречистителната станица за отпадни води во Скопје веќе требаше да започне и рокот одамна е веќе изминат. Последна пречка што требаше да се премости беше експропријација на земјиште и урбано планирање, според најавите од министерката за животна средина Каја Шукова.
А.К.
