Зет на Заев бришел подружници додека му трае спорот со корнишоните
Отворен е стечај за „Дена продукт“ фирмата за корнишони на зетот за братучетка на поранешниот премиер Зоран Заев, Атанас Костов, кој претходно го сменил името на фирмата и се обидел да ги избрише подружниците.
Во текот на септември минатата година австрискиот амбасадор алармираше дека „Дена Продукт“ не го испочитувал договорот за есклузивен извоз со австриската АММА. Со договорот и се овозможило на македонската компанија финансиска поддршка преку авансно плаќање, по што следуваше тужба од АММА за оштета од 4 милиони евра.
Пред крајот на минатата година Костов ја преименувал „Дена продукт“ во „Феникс Аграр. Седиштето на фирмата го преместил од Велес во Аеродром, Скопје. Подружниците како оранжеријата во Богданци, откупниот центар за овошје и зеленчук и магацинот за хемиски производи во Василево, биле избришани.
На 16 февруари Костов по уважена жалба добил решение да го врати стариот статус на фирмата – името,седиштето и подружниците. Во меѓувреме на 6 февруари е започната постапка за отворање на стечај, која завршила со одлука на судот на 28 февруари. Основниот граѓански суд Скопје во овој период за стечаен управник го одредил Драги Димовски од Струмица.
На телефонскиот повик Димовски не одговори колкава е стечајната маса на „Дена Продукт“ и рече дека е зафатен во моментот.
– Тоа што биле бришени подружниците на „Дена Продукт“ нема никаква врска со стечајната маса на фирмата, ни рече кратко стечајниот управител.
Според претходни медиумски информации, Судот во Велес на барање на Обвинителството донел решение на 12 февруари да му се забрани на Костов и „Дена продукт“ да го оттуѓуваат имотот. За адвокатот на АММА, промената на називот и локацијата биле однапред планирани и се обид за прикривање од доверителите.
Поранешниот амбасадор на Австрија, Георг Вуцас во јуни 2023 година ја актуелизираше темата за австриската фирма АММА и спорот кој го има со „Дена Продукт“. Упати директни критики кон македонските судови поради неможноста на австриската компанија да ја наплати отштетата, барајќи смена на судии и јавни обвинители.
А.К.
