Земал 15.000 евра камата за заем од 35.000 – пријава за лихварство и фалсификати

СВР Тетово поднесе кривична пријава против Т.В. (39) од селото Неготино, Гостиварско, поради постоење основи на сомнение за сторени кривични дела: „лихварство“, „употреба на исправа со невистинита содржина“, „фалсификување на исправа“ и „злоупотреба на лични податоци“.

Исто така, кривично се пријавени и Ј.Д. (48) од село Добри Дол, како и правно лице – нотар од Гостивар, за кривични дела „несовесно вршење на службата“, „фалсификување на исправа“ и „злоупотреба на лични податоци“.

Според информациите, во периодот од 2022 година до денот на поднесување на пријавата, Т.В. ја искористувал тешката имотна состојба на оштетено лице од Гостивар, на кое повеќепати му позајмувал пари со несразмерно висока камата. За заем од 35.000 евра, побарал камата од 15.000 евра за една година, а потоа секој месец дополнително му барал по 3.000 евра. Бидејќи оштетениот не можел да ги исплати средствата, Т.В. со закани и присила го натерал да потпише договор за купопродажба на имот, кој бил нотарски заверен.

Понатаму, на 27 септември 2023 година, пријавениот Т.В. изготвил фалсификуван договор за купопродажба на моторно возило кај нотар, во време кога оштетениот бил надвор од државата. Второпријавениот Ј.Д., како овластено лице на нотарската канцеларија, без присуство и без согласност од оштетениот, злоупотребил лични податоци и заверил лажен договор во кој е наведено дека возилото се продава на И.А. од Гостивар за 1.000 евра.

Полицијата презема натамошни мерки во координација со надлежното обвинителство.