„Земјата плаче а небото се радува, одлучи да не го оставиш Андреј сам“ – пријателите и обожаватели се простуваат од Панчо
Македонската музичка сцена тагува по ненадејната смрт на Владимир Блажев – Панчо, член на познатото дуо ДНК. Веста за неговото заминување остави силен белег меѓу неговите колеги, пријатели и обожаватели, кои преку социјалните мрежи упатуваат потресни пораки на збогување.
Меѓу најемотивните беше реакцијата на пејачката Елена Ристеска, која со години беше блиска со Панчо и соработуваше со него на многу музички проекти.
„Ах бре Пане, ме скрши на милион парчиња! Не стигнав да ти кажам колку те сакам, а си замина… Ми беше брат кој никогаш го немав! Со кого сега да се смеам, кога нашите шали само ние си ги разбиравме!? Со кого сега да седам на клупи во маало и да си зборувам со саати?!… До следно видување, таму горе, каде нема вакви неправди и болка“, напиша Ристеска, споделувајќи фотографии и спомени од нивното пријателство.
Со болка и неверување се прости и водителката Лила Филиповска, која Панчо го нарече свој „кум“. Таа објави заедничка фотографија и напиша:
„Куме барам зборови, немам зборови со кои би опишала како ја доживеав оваа вест …. Сѐ уште не верувам дека твоето ГОЛЕМО срце не издржа. Ова што го пишав на сликава пред неколку месеци верував дека така и ќе биде…, ама ти куме одлучи да не го оставиш Андреј сам…, земјата плаче а небото се радува зошто доби уште еден ангел. Пејте заедно и знајте дека вечно ќе фалите.“
Порака на збогување упати и Сергеј Цетковиќ, кој во емотивна објава напиша дека Панчо за него бил брат:
„Од првиот ден те гледав како брат. Имавме многу планови, многу идеи… Патувај, брате мој, нека те водат ангелите на подобро место.“
Од Панчо се простија и бројни македонски јавни личности. Јован Јаулески напиша дека Панчо бил човек со големо срце и насмевка што никогаш не згаснува, а Влатко Ѓорчев потсети дека тој бил посветен татко и сопруг, човек кој оставил длабока трага кај сите што го познавале.
„Беше добар човек, сопруг и татко на две деца. Нека му е лесна земјата,“ напиша Ѓорчев.
Смртта на Панчо Блажев остави празнина во македонската музика и кај сите кои го познаваа не само како уметник, туку и како пријател, брат и човек со големо срце.
Неговата музика и насмевка, велат пријателите, ќе живеат вечно.
