Зеленски вети: Ќе преземеме повеќе мерки против Русија
Претседателот Володимир Зеленски во своето доцно видео обраќање рече дека Украина јасно сфатила каде да изврши притисок врз Москва. Претходно, украинските власти соопштија дека Русија ја погодила украинската пристанишна инфраструктура и магацините за жито, но исто така известија за одреден напредок на линијата на фронтот во тримесечната контраофанзива на нејзините сили.
Во своето традиционално вечерно видео обраќање, украинскиот претседател Володимир Зеленски рече дека санкциите против Русија не се доволни за да се запре нејзината „агресија“.
„Јасно гледаме кои насоки на притисок врз Русија треба да се зајакнат за да не се зголеми нејзиниот терористички потенцијал. Санкциите не се доволни. Ќе има повеќе наши, украински акции против терористичката држава. Се додека руската агресија продолжува, Русија мора да ги почувствува загубите“.
Најмалку седум села во руската погранична област Курск утринава останаа без електрична енергија откако украинско беспилотно летало нападна дел од локалната електрична мрежа. Дронот фрлил експлозивна направа на трафостаница во руското село Снагост, на околу 15 километри од украинската граница, објави во Телеграм гувернерот на областа Курск, Роман Старовоит. Во нападот нема повредени. Подоцна, минофрлачките гранатирања делумно ја прекинаа струјата во друго село кое се наоѓа веднаш на границата. Два камикази беспилотни летала беа соборени во пограничната област.
Претходно беше објавено дека Русија извршила уште еден напад врз украинската пристанишна инфраструктура и складишта за жито. Московските сили нападнаа со беспилотни летала магацини во дунавското пристаниште Измаил, кои Киев ги користи за извоз на жито. Пријавени се повредени, како и сериозна материјална штета.
Холандија планира да ја пренесе првата серија ветени борбени авиони Ф-16 во Украина во 2024 година, изјави министерот за одбрана Каиса Олонгрен. Според неа, прво треба да бидат обучени украинските пилоти, техничари и сите кои се вклучени во управувањето и одржувањето на авионите. Во август, Холандија објави дека ќе ги обезбеди сите свои борбени авиони Ф-16 на украинската војска, освен неколку што ќе се користат за обука.
Естонија и се приклучи на Германија во заедничката програма за снабдување со муниција на Украина, јави ДПА. Двете земји веќе ја проширија соработката во областа на оружјето. Заедно со Летонија, Естонија се согласи да го купи системот за воздушна одбрана со среден дострел Ирис-Т од германско производство.
