Зеленски призна: Руските сили напаѓаат и уништуваат градови и села
Украинскиот претседател Володимир Зеленски изјави дека ситуацијата на фронтот во Украина е крајно отежната, особено во регионот на Доњецк, каде Русија ја интензивира својата офанзива, пренесе Ројтерс.
Во својата традиционална вечерна изјава, Зеленски рече дека руските сили не само што ги напаѓаат украинските позиции, туку и ги уништуваат градовите и селата околу нив.
Зеленски го обвини и шефот на Меѓународниот олимписки комитет Томас Бах за лицемерие и го покани да го посети градот Бахмут, една од жешките точки на војната со Русија, објави Франс прес.
„Го поканувам господинот Бах во Бахмут за да види со свои очи дека неутралноста не постои“, рече Зеленски. Тој во својата изјава вети и дека ќе работи, како што рече, на чистење на раководството на меѓународните олимписки структури од лицемерие.
„Очигледно е дека секое неутрално знаме на руските спортисти е извалкано со крв“, рече Зеленски.
И покрај постојаните повици на Украина да им забрани на руските и белоруските спортисти од Олимпијадата во Париз во 2024 година, Меѓународниот олимписки комитет во средата соопшти дека ја истражува можноста да им дозволи да се натпреваруваат под неутрално знаме.
Есента беа преземени и низа маневри зад сцената за да ги вратат Русите и Белорусите, кои беа исклучени од повеќето меѓународни спортски настани од почетокот на руската инвазија на Украина, во олимписките натпреварувања.
Овие предлози предизвикаа гнев кај Украинците. Вчера украинскиот министер за спорт Вадим Гутцеит се закани дека ќе ги бојкотира Олимписките игри следната година доколку не се послушаат повиците на Украина.
„Но, ќе направиме се за да го заштитиме светот на спортот од какво било мешање на терористичката држава, што едноставно би било неизбежно доколку руските спортисти учествуваат на Олимписките игри во Париз“, рече Зеленски.
„Русија мора да престане со својата агресија и својот терор. И само тогаш ќе може да се разговара за руското учество во контекст на олимпизмот“, додаде шефот на државата.
