Зеленски ја отфрли можноста за мировни преговори со Русија
Украинскиот претседател Володимир Зеленски во саботата го отфрли можниот почеток на мировни преговори со Русија.
„Такво нешто нема и нема да биде“, рече Зеленски на прес-конференција по средбата со претседателката на Европската комисија, Урсула фон дер Лајен, во Киев.
Зеленски ги негираше наводите дека западните земји вршат притисок врз него да започне преговори со Русија.
„Никој не ме тера денеска. Сето ова се случи на почетокот на војната и пред војната“, рече Зеленски.
Тој нагласи дека клучен проблем во моментов е контролата на небото од страна на Русија, а решение за тоа е набавка на ловци Ф-16.
„Веќе има одлука (за испораки на Ф-16). Го чекаме завршувањето на обуката на украинските пилоти“, изјави украинскиот претседател.
Зеленски, исто така, призна дека конфликтот на Блискиот Исток го оттргна вниманието од Украина, што „се гледа од резултатите“ од разговорите со претставникот на ЕУ, додавајќи дека се надева дека блискоисточниот конфликт ќе заврши наскоро.
