Зеќири се расплака пред судот: 593 денови трае мојата лична драма, ни крив ни должен
Екс генсекот на Владата Мухамед Зеќири денеска во завршните зборови во кривичната постапка против него истакна дека 593 денови трае неговата лична драма, ни крив ни должен, како што покажал текот на судењето.
„593 денови агонија во која мојот живот е превртен на глава“, вели тој.
Според него, не може да биде обвинет за такво кривично дело, бидејќи вели извршувал туѓи замисли, а не своја замисла.
„На почетокот на годината ненадејно почина мојот помал брат, оставајќи зад себе 3 малолетни деца, а потоа на мојата сопруга, како што е документирано во судот ѝ беше дијагностицирана тешка болест. Нејзиното лекување трае веќе 9 месеци, се уште не е завршено и не знаеме колку ќе трае и како ќе заврши. 593 дена откако бев стигматизиран во јавноста, не сум имал можност да заработам приходи за да се грижам и да им помагам на 4 деца, 3 мои и едно од претходниот брак на сопругата. Во овој период сите материјални обврски паѓаат на товар на родителите на сопругата, кои од странство дојдоа во Скопје за да се грижат за нас и обвинителството парадоксално ги користеше како главен аргумент за продолжување на мојот притвор, посочувајќи дека можат да бидат јатаци“, рече Зеќири со солзи во очите.
Тој побара ослободителна пресуда.
Инаку, пресудата за предметот ќе биде објавена на 1-декември.
