Здравјето на Лојд Остин ги загрижи властите во САД
Американскиот секретар за одбрана Лојд Остин во саботата изјави дека ја презема „целосната одговорност“ за тајноста околу неговата еднонеделна хоспитализација поради сè уште неодредена медицинска состојба, пренесува Ројтерс.
Остин, кој има 70 години, беше примен во Националниот воено медицински центар Волтер Рид на Нова година. Пентагон соопшти дека причината се компликации од неодамнешната рутинска медицинска процедура.
Но, овој факт Министерството за одбрана го чуваше во тајност цели пет дена. Ова ги налути конгресмените.
Сенаторот Роџер Викер, републиканец од Комитетот за вооружени служби на Сенатот, го обвини Пентагон дека не го информирал навремено Конгресот за такви работи, како што налага законот.
Не е јасно колку информации беа споделени дури и во администрацијата на претседателот Џо Бајден. Американски официјален претставник, кој сакаше да остане анонимен, рече дека Бајден не бил информиран до четвртокот навечер. Сепак, тој ја задржа довербата во Остин и двајцата разговараа во саботата вечерта, изјави втор американски официјален претставник.
Портпаролот во саботата изјави дека Остин бил на должност од петокот вечерта, но останал во болница.
Асоцијацијата за печат на Пентагон, во писмо до официјалните лица во петокот вечерта, ја критикуваше тајноста на Министерството за одбрана, велејќи дека Остин е јавна личност за која не може да има медицинска доверливост во таква ситуација.
Дури и американските претседатели откриваат кога треба да делегираат должности поради медицински процедури.
