Заврши протестот за поддршка на екс лидерите: „ОВК беше војска на ослободување, достоинство и слобода, а не криминална организација“
Стотици демонстранти денеска пристигнаа на плоштадот „Скендербег“ во Скопје, пред почетокот на најавениот протест во поддршка на поранешните лидери на ОВК, на кои им се суди пред Специјализираните совети во Хаг.
Членот на Организацискиот совет на протестот, Берат Хајдари, изјави дека собирот е посветен на кауза која, како што рече, го допира срцето, идентитетот и колективната меморија.
Тој нагласи дека учесниците не ја негираат правдата, ниту се спротивставуваат на законот, туку бараат еднаква примена на правото и недозволување искривување на историјата.
„Не сме тука да ја негираме правдата, туку да ја бараме. Не сме против законот, туку потсетуваме дека законот мора да биде еднаков за сите и дека историјата не смее да се извртува“, порача Хајдари.
Во поддршка на поранешните водачи на ОВК се обрати и Хазган Хаклај, кој истакна дека ОВК, според него, не може да биде оцрнета, бидејќи претставува една од најсветлите епохи во современата албанска историја. Тој додаде дека денешниот протест во Скопје ги обединил Албанците од повеќе средини.
Своја порака упати и Шќипдона Мазари, ќерка на загинатиот борец Нури Мазари, која побара, како што рече, непристрасна, балансирана и независна правда за обвинетите во Хаг.
Таа нагласи дека ОВК била војска на ослободување, достоинство и слобода, а не криминална организација.
Протестот се одржува во време кога поранешни високи функционери на ОВК веќе неколку години се наоѓаат во притвор во Хаг, обвинети за воени злосторства и злосторства против човештвото, обвиненија кои тие ги негираат.
