Започнува лотаријата за зелена карта за Америка
Периодот за пријавување на лотаријата за зелена карта за 2025 година започнува на 4ти октомври во 18 часот и ќе трае до 7 ноември 2023, до 18 часот по локално време. Кандидатите може да се пријават на официјалната веб страна https://dvprogram.state.gov/ на која има целосни инструкции.
Учеството во лотаријата е бесплатно. Им препорачуваме на кандидатите да аплицираат порано и лично да ги подготват и поднесат своите пријави. Кандидатите можат да побараат помош од страна на трето лице кое ќе ја поднесе пријавата во нивно име, но за едно лице може да има само една апликација секој кандидат е одговорен за своите податоци и дали поднесените информации во пријавата се потполни и точни. Внесување на неточни или нецелосни податоци може да доведе до дисквалификување на кандидатот дури и откако е извлечен како добитник. Без разлика дали пријавата е поднесена лично или со помош на адвокат, пријател или роднина, секој кандидат може да поднесе само една лична пријава. Поднесувањето на повеќе лични пријави ќе доведе до дисквалификување од лотаријата.
Секој кандидат треба да ја испечати и зачува потврдната страница од пријавата по пополнувањето на апликацијата за да може да ја провери. Исто така, секој кандидат треба да го зачува својот единствен број барем до 30 септември, 2025 година, без разлика дали е извлечен на почетокот. Овој број е единствениот начин преку кој може да се провери дали кандидатот е избран.
Кандидатите ќе можат да проверат дали се избрани преку програмата почнувајќи од 4 мај 2024 година.
