Започна електронското пријавување за студентски домови
Студентите од втора и повисоките години, како и апсолвентите, од денеска можат електронски да аплицираат за сместување во државните и приватните студентски домови за академската 2025/2026 година. Пријавувањето ќе трае до 31 јули, соопштува Министерството за образование и наука (МОН).
Бруцошите ќе имаат можност да се пријават по завршувањето на уписите, односно во периодот од 10 до 17 септември.
Апликациите се поднесуваат преку интернет, на веб-страницата e-uslugi.mon.gov.mk, каде што студентите треба да прикачат и потребни документи. Секој кандидат може да конкурира само за еден студентски дом.
Според конкурсот, на располагање се вкупно 4.264 слободни места во студентските домови во Скопје, Битола, Штип, Тетово, Охрид и Прилеп. Од нив, 851 се наменети за бруцоши, а 3.413 за останатите студенти.
Поради тековна реконструкција, домовите „Кузман Јосифовски – Питу“ и „Стив Наумов“ во Скопје засега остануваат затворени. Сепак, се очекува тие да бидат достапни за студентите од вториот семестар.
Најголем број слободни места во Скопје има во студентскиот дом „Гоце Делчев“ – 1.212 места, потоа во „Пелагонија“ – 997 места, како и во „Томе Стефановски – Сениќ“ со 335 места. Во Битола, студентскиот дом „Кочо Рацин“ располага со 385 слободни места, додека во Прилеп, „Орде Чопела“ има 330.
Во Охрид, студентскиот дом „Никола Карев“ располага со 242 слободни места. Штип нуди вкупно 348 места – 236 во државниот дом „Браќа Миладиновци“, 60 во приватниот дом „Хилјадников“ и 52 во „Логос“. Во Тетово, државниот дом „Тетово“ располага со 295 места, а приватниот дом на УЈИЕ со 120.
Конечните резултати за студентите од втора и повисоките години ќе бидат објавени најдоцна до 6 септември, а за бруцошите до 30 септември. Сместувањето започнува веднаш по потпишувањето на договорот со домот, а најдоцна 10 дена по објавувањето на конечниот список.
