Запленети товарни возила од половина милион евра на компанија поврзана со тендери за РЕК Битола
Кривичниот суд Скопје на барање на Основното јавно обвинителство за организиран криминал и корупција замрзна имот на компанијата Салус Плус Битола со забрана да користи и отуѓува транспортни и патнички возила во вкупна вредност од 520.000 евра.
ОЈО за организиран криминал и корупција се сомнева дека оваа фирма и нејзиниот сопственик и управител Александар Наумов, како осоменичен, се вовлечени во злосторничко здружување, како и даночно затајување по две основи. Обвинителството барањето го испратило на 27 октомври, а Кривичен суд го прифатил на 31 октомври.
Станува збор за компанија која пред два месеци го променила името во Салус Плус Битола, а претходно се викаше „Новоматрикс“ и беше позната по тоа што склучи два договори за технолошко чистење на рудниците на РЕК Битола вредни над 3 милиони евра, при што вториот договор лани го доби во постапка со директни преговори.
Осомничениот Наумов претходно беше управител на „СВ-Инвест“ која во 2021, како што тогаш известуваа медиумите, отиде во стечај со вкупно признаен долг кој надминува 25 милиони евра кон доверителите, а пред тоа добиваше милионски тендери од ЕСМ . „Новоматрикс“ во меѓувреме продолжи да добива слични договори од ЕСМ. „СВ-Инвест“ отиде во стечај иако претходно прикажуваше милионски добивки и беше една од најбрзорастечките битолски компании.
Меѓу запленетите возила, според вредноста, доминираат товарните, меѓу кои има 13 камиони и едно приклучно возило-приколка. Повеќето се релативно нови и произведени од пред неколку години а марките се MAN, Ford и Mercedes-Benz.
„Привременета мерка може да трае најдолго до завршување на кривичната постапка пред првостепениот суд или може да биде укината по службена должност. Сите дејствија врз имотот што е предмет на обезбедување, а се преземени по поднесување на барањето за привремени мерки, се ништовни“, гласи барањето на Обвинителството до Централниот регистар, а истовремено на МВР му се наложува да изврши прибелешка на возилата.
Со новата власт се појавија и нови играчи за тендерите на ЕСМ. Првично тоа беше фирмата „СВ-Инвест“, а од неодамна, меѓу другите, и фирмата „Новоматрикс“, која за 2020, како што претходно објавуваа медиуми, прикажала вкупни приходи од 4,6 милиони евра, додека годините пред тоа воопшто ги немала.
„Основното обвининителство за гонење на организиран криминал и корупција во интерес на постапките што ги спроведува, а воедно и заради почитување на институтот пресумпција на невиност, во моментов не е во можност да одговори на вашите прашања“, гласи одговорот кој го добивме од ОЈО за организиран криминал и корупција по неколку поставени прашања.
Од ова Обвинителство, каде што и онака транспарентноста кон јавноста е на оскудно ниво, особено со доаѓањето на Ислам Абази на чело, засега не кажуваат за кое дело поконкретно станува збор и во која фаза е овој случај? Дали ќе има понатамошни заплени, освен моторни возила, и колкав имот, односно со колкава вредност, треба да биде запленет? Дали случајот опфаќа и други лица и од кога датумски е инициран?
Александар Кузмановски
