Запленети 161 килограми кокаин во Солун, во заедничка акција на грчката и македонската полиција
Во заедничка операција во Солун се запленети 161 килограми кокаин, соопшти македонското МВР.
Имено, во акцијата на Единицата за недозволена трговија со дрога, Сектор за недозволена трговија со дрога, оружје и опасни материи при Одделот за криминалистичка полиција на македонското МВР, во потоа Службата за борба против дрога од Солун, Американската служба за борба против дрога – ДЕА и Центарот за спроведување на законот во Југоисточна Европа – СЕЛЕК, дрогата е запленета во солунското пристаниште.
Вчерашната акција е продолжение на успешната акција од 8 и 9 мај годинава, кога во Солун беа запленети 105 кг кокаин и беа лишени од слобода 10 лица во Грција, и тоа 7 лица државјани на Република Грција и 3 лица државјани на Република Албанија, додека во Република Северна Македонија беа лишени од слобода 4 лица, наши државјани, кои во моментот се притворени и се наоѓаат во истражниот затвор Скопје, информира МВР.
Во рамки на проверките за лицата и фирмите кои биле инволвирани во првиот случај на заплена на 105 кг кокаин пред еден месец, било утврдено дека веќе уапсените нарачале и организирале и втора, нова количина на кокаин од Еквадор. Вчера македонските полицајци со нивните грчки колеги ја пронашле и таа пратка, односно 100 пакувања, со вкупна тежина од 161 килограм. Кокаинот бил пронајден во специјално направени бункери – крипти во шините од подот на двата контејнера.
Одделот за крим-полиција во текот на следната недела ќе достави известување до надлежниот Јавен обвинител од Основното јавно обвинителство за гонење на организиран криминал и корупција, како што соопшти портпаролот на МВР, Сузана Прањиќ – Талевска.
