Занаетчиите предупредуваат: Наглото зголемување на минималната плата може да ја загрози нивната работа
Занаетчискиот сектор и малите семејни бизниси во земјава се наоѓаат пред можни сериозни финансиски предизвици поради најавеното зголемување на минималната плата на 600 евра, предупредува Занаетчиската комора – Скопје. Иако растот на минималецот може да ја подобри куповната моќ на работниците, Комората нагласува дека имплементацијата мора да биде внимателно планирана за да не доведе до негативни последици за стопанството.
Од Комората појаснуваат дека не се против покачување на платите, но дека тој треба да биде реален, законски утврден и темелно анализиран. Наглото зголемување на минималецот би значело драстично зголемување на трошоците за придонеси, што многу занаетчии не можат да го издржат. Во услови на растечки трошоци за струја, репроматеријали и закупнини, дополнителниот финансиски притисок може да резултира со затворање на дуќаните и отпуштање на работници.
Претседателот на Комората, Горан Ристовски, посочи дека особено ранливи се занаетчиите од помалите градови и руралните средини, каде што куповната моќ е пониска, а и работната сила и клиентелата се намалуваат. За да ја зачуваат ликвидноста, многу занаетчи би биле принудени да ги зголемат цените, што дополнително може да ја намали побарувачката.
Ристовски истакна дека новата минимална плата директно ќе ги погоди и занаетчиите кои плаќаат паушален данок, како и оние кои се оданочуваат според реално остварен приход, бидејќи повисоките придонеси ќе важат без оглед на моменталните приходи.
Прашањето за минималецот се актуелизира по барањата на Сојузот на синдикати на Македонија, кои инсистираат на зголемување на 600 евра како заштита од инфлацијата и растот на трошоците за живот. Синдикатите сметаат дека платите заостануваат зад реалните потреби, додека од занаетчискиот сектор предупредуваат дека унифицираното покачување може да доведе до губење работни места, наместо нивна заштита.
Според податоците на Комората, во Скопје работат над 2.300 занаетчии, а на ниво на држава нивниот број изнесува речиси 8.000. Иако се забележува растечки интерес кај младите за дуалното образование и занаетчиските професии, Комората нагласува дека без внимателно балансирање меѓу социјалните цели и економската реалност, ризикот овие работни места да исчезнат останува висок.
