Захарова: Распоредувањето на западните сили во Украина носи ризик од директен конфликт меѓу Русија и НАТО
Денеска Москва силно се спротивстави на распоредувањето на западните мировни сили во Украина, предупредувајќи дека тој потег може да доведе до директен конфликт меѓу Русија и НАТО.
Портпаролката на руското Министерство за надворешни работи Марија Захарова изјави за новинарите дека Москва „категорично се противи“ на распоредувањето на западните мировни сили во Украина, обвинувајќи ги Лондон и Париз за прикривање на плановите за воена интервенција.
„Русија категорично се противи на таквото сценарио (испраќање западни мировни сили во Украина), кое се заканува со директен конфликт меѓу Русија и НАТО“, рече Захарова на прес-конференција.
Захарова рече дека Лондон и Париз „продолжуваат да прават планови за воена интервенција во Украина“ и додаде дека ја „прикриваат како некаква мировна мисија“.
Франција и Велика Британија одделно покренаа иницијатива за распоредување европски вооружени сили во Украина, со цел да се обезбеди спроведување на мировниот договор со одвраќање на Русија од повторно напад на земјата.
Францускиот претседател Емануел Макрон изјави денеска, по самитот на лидерите на околу 30 земји, НАТО и Европската унија во Париз, дека испраќањето на западните воени сили во Украина не го поддржуваат сите европски сојузници, туку само некои.
Договорите со посредство на САД – овонеделните за заштита на пловидбата во Црното Море и минатонеделните за запирање на нападите врз енергетската инфраструктура, беа поздравени како прв чекор кон мирот. Но, Украина и Русија не се согласија околу деталите и меѓусебно се обвинуваат за прекршување на договорот.
