ЗА ПЛОЧКАР, МОЛЕР, ФАСАДЕР МОЖЕ ДА СЕ СЛУЧИ ДА ЧЕКАТЕ СО МЕСЕЦИ: Дали се ова „златни времиња“ за занаетчиите?

Полни раце работа
имаат занаетчиите во Македонија. Ако ви треба плочкар, молер, фасадер големи се
шансите дека ќе треба да почекате месец или два додека да дојдат и да ја
завршат работата, затоа што се презафатени. Ова се веројатно „златни времиња“
за занаетчиите. Имаат многу работа, но и добра заработка. Иселувањето во
странство е фактор кој придонесе за ваква состојба.

„Јас имам многу
работа. За термини се чека. 
Ситуацијата е таква каква што е. Чекаат луѓето најмалку месец – два за
поголема работа, за фасада. Човек во Гостивар нè чекаше пола година. Сега се заработува,
ама работна сила нема. Мајстори за работа тешко се наоѓаат. Сигурно ќе биде
бетер, 100 отсто сум сигурен. „Златно време“ е  за оние кои работат за себе. Од друга страна,
да ти треба мајстор и да не е квалитетна услугата, мораш да платиш. И тие што
не се мајстори, ќе си ги платиш и нив. Добро е луѓето да бараат препорака, да
се распрашаат, да најдат некои мајстори кои ги знаат ако сакаат работата
квалитетно да им биде завршена“, вели молер од Скопје.

Но, не е само во
главниот град, туку и во внатрешноста има доста работа за занаетчиите. Дел од нив велат
дека однапред имаат обврски за следните неколку месеци.

„Има работа
доста. Претежно работам во Гевгелија и околината. Сега и во текот на летото има
повеќе работа. И според слободното време и според буџетот луѓето реновираат по
дома. Работа отсекогаш имало, не е дека немало, но зависи на кој како му се
работи. Ако ти се работи, ако си добар мајстор, од еден на друг те
препорачуваат и те викаат. Ние немаме никакви огласи, реклами, а барани сме. Од конкуренција не се плашам, затоа што јас сум
за тоа секој да работи и да си извади пари за опстанок на семејството. Работа
има за сите кои сакаат да работат“, додава плочкар од Гевгелија.

Анета Атанасовска од Занаетчиската комора Скопје вели
дека допрва доаѓаат времиња кога за услугите
на квалитетните мајстори ќе треба да платиме поскапо. Објаснува дека бројот на
мајстори во земјава е намален поради иселувањето и поради тоа што младите
немаат интерес за занаети и затоа добрите кадри се пребукирани.

„Миргацијата се
развива, многу занаетчии си ги затворија дуќаните и заминаа во Словенија,
Хрватска, Германија, а мал број млади лица се одлучуваат да отворат бизнис,
туку продолжуваат со високо образование и откако нема да најдат работа, се
преквалификуваат. Допрва ќе дојде тоа време кога ќе може занаетчијата да ја
наплати услугата која ја пружа, цената допрва ќе расте. Помал е бројот на
занаетчии во споредба со изминативе години, во некои сектори. Во градежништвото
немаме доволно мајстори, немаме паркетари, ѕидари, плочкари, водоводџии,
инсталатери на парно греење, поправка на машини и апарати. Се соочуваме со
дефициит на мајстори кои можат да испорачаат услуга“, рече Атанасовска.

Таа објаснува
дека многу мајстори работат на „црно“, луѓето нив ги наоѓаат преку огласи на
интернет, преку социјалните мрежи и со тоа може да се случи да не бидат задоволни од услугата. Во Скопје
има околу 2.700 регистрирани занаетчии кои се активни.

Сања Атанасовска

foto freepik.com