За Николоски и Коридор 8 е важен проект, Бугарија се заканува со пријава за саботажа
Министерот за транспорт и вицепремиер Александар Николоски вчера на собирот на министри од неговиот ресор во Будимпешта порача дека и железничкиот Коридор 8 останува важен проект – исто како и Коридор 10.
„На средбите разговаравме за развој на транспортниот сектор во регионот. Ги претставивме приоритетите на Македонија – изградба на брза пруга на Коридор 10 како и олеснување на транспортот и трговијата меѓу земјите од Западен Балкан, како и изградбата на Коридор 8“, објави Николоски.
На состанокот со министрите од земјите членки на ЕУ тој најави „силен инвестициски циклус во изградбата и модернизацијата на железничката инфраструктура“.
„Во одвоени средби со министерот за градежништво и инвестиции на Унгарија Јанош Лазар, со заменик претседателката на Владата и министерка за инфраструктура на Албанија, Белинда Балоку како и претседателот на Заедницата на европски железници Алберто Мацола, информирав дека Македонија ги засилува инвестициите во изградба и модернизација на европските транспортни коридори 8 и 10, поврзувајќи ја оската Исток-Запад, како и брзо поврзување со југ со Атина и на север со земјите од Централна Европа“, порача вицепремиерот од Будимпешта.
Во меѓувреме од Бугарија стигнаа закани дека Македонија ќе биде пријавена во Брисел „за саботажа на изградбата на Коридор 8“. Лидерот на „Преродба“ Костадин Костадинов побара Народното собрание на Бугарија да издаде декларација.
Во декларацијата, според бугарскиот пратеник, треба да пишува дека Бугарија мора да ги информира своите партнери во Европската унија (ЕУ) за тоа што се случува од другата страна на границата – дека има саботажа против паневропските политики и една од нив е Коридорот број 8.
„Кога сакате да бидете во заеднички европски дом, мора да ја почитувате политиката на овој заеднички европски дом. Еден од условите е да имате политика на добрососедство. Потпишавме Договор за пријателство и добрососедство со Северна Македонија. што во моментов гледаме дека искрено се прекршува, се разбира, сфаќаме дека тоа е намерна политика за провокации, која во моментов нашата влада ја игра многу добро“, нагласи Костадинов.
