ЗА КОЈА ВОДА МАКЕДОНЦИТЕ ПЛАТИЈА 7 МИЛИОНИ ЕВРА? Се бара и пие од 1968 година до сега!
„Пелистерка“ е најстар и најпознат домашен производител на вода во амбалажа. Лани имаа исклучително добра година затоа што успеаја во услови на одржување исти приходи од продажба преку кратење на оперативните и на финансиските расходи да ја зголемат добивката за 3,5 пати.
Најпознатиот македонски бренд меѓу флашираните води лани успеа да оствари приходи од 7 милиони евра, покажуваат официјалните неревидирани финансиски податоци на „Пелистерка“ најстарата и веројатно најпопуларна македонска газирана вода.
Според податоците објавени на СЕИ НЕТ берзанскиот систем „Пелистерка“ го задржала своето пазарно учество на домашниот пазар, а во меѓувреме успеала да го зголеми извозот за речиси три пати во споредба со 2023 година.
На домашниот пазар „Пелистерка“ пласирала освежителни и безалкохолни пијалоци, најмногу вода (мирна и газирана) во вкупна вредност од 6,85 милиони евра. Извозот на „Пелистерка“ и покрај тоа што е симболичен во однос на домашниот пласман и изнесува 1.500 евра, сепак бележи значаен раст во споредба со претходната година.
Компанијата лани остварила значаен раст на добивката благодарејќи на тоа што ги скратила своите трошоци. Податоците покажуваат дека вкупните оперативни расходи изнесуваат 5,95 милиони евра и се за 4 отсто пониски од 2023 година. Кај трошоците за суровини и материјали заштедата е најголема. Тие изнесуваат 2,89 милиони евра и се за 17 отсто пониски од претходната споредбена година. Интересно е што компанијата ги намалила и трошоците за своите вработени и тоа во услови кога генерално растат трошоците за вработените кај голем број компании. За нив „Пелистерка“ лани платила 720.000 евра што е за 17 отсто помалку од претходната споредбена година.
Најголем раст има кај останатите расходи, тие лани достигнале 908.000 евра и се за 2,25 пати повисоки од 2023 година.
Оперативната добивка изнесува 922.000 евра, но поради значајните издатоци за финансиски расходи (кои се за 28 отсто пониски од 2023 година н.з.) нето добивката изнесува 603.000 евра.
Тука е важно да се истакне дека воспоредба со 2023 година профитот на „Пелистерка“ е зголемен 3,5 пати и надминува 603.000 евра.
Н.С.
