За функционерите – поголеми плати за 78%, за народот – намалени макарони за 4 денари
Додека граѓаните имаат намалени макарони за само 4 денари и истата одлука помпезно се промовира во јавноста, од Синдикатот на управа, правосудни органи и здруженија на граѓани УПОЗ велат дека функционерите ќе добијат зголемување на плата за „само“ 78 отсто.
Ваква можност добиваат со новата одлука на Уставниот суд со која се укинуваат два члена на Законот за плата и надоместоци на функционерите.
Со тоа уставните судии, премиерот, претседателот, собранискиот спикер, но и сите вршители на јавни функции ќе земаат речиси двојно повисока плата, односно според груба пресметка на УПОЗ, со оваа одлука платата на претседателот ќе скокне од 93.000 денари, на 165.000 денари.
Платите на премиерот Димитар Ковачевски, и на претседателот на Собранието, Талат Џафери, ќе се зголемат на околу 2.500 евра, додека оак платата на министрите ќе изнесува околу 1.800 евра.
„Просечната бруто плата за 2022 година е 47.700 денари. Кога ќе се помножи со коефицентот од член 12 од истиот закон, а почнуваат од 2.20 до 4.50, значи пресметано во денари или во евра, пратседателот, собранискиот спикер и премиерот ќе имаат плата од 2500 евра, министрите околу 1800 евра, другите фукнционери и судиите околу 1600 евра“, порачаа од УПОЗ.
Инаку, повисока плата ќе добијат и сите заменици министри, градоначалници, директори во државни фирми и агенции, како и судии меѓу кои и тие од Уставниот суд кои практично со укинување на 2 члена од Законот за плати на функционерите го овозможија општото покачување.
