За еден ден седум жени биле убиени во семејно насилство во Турција
Седум жени се убиени во семејно насилство во Турција, јави локалната телевизија Хабер Турк.
„Вкупно седум жени беа брутално убиени денеска, во еден ден, во Измир, Бурса, Сакарија, Ерзурум, Денизли и Истанбул“, додава турската телевизија, наведувајќи дека осомничените се нивни сегашни и поранешни партнери.
Хабер Турк на својата веб-страница објави фотографии и имиња на жртвите.
Тие жени на возраст од 32 до 49 години биле убиени со огнено или ладно оружје, а тројцата сторители потоа се самоубиле.
Двајца се уапсени, а еден е ранет при апсењето и починал малку подоцна.
Ништо не се кажува за судбината на седмиот убиец, кој побегнал од затвор за да ја убие сопругата.
Минатата година платформата за заштита на правата на жените „Ќе ги запреме феминицидите“ забележа 315 убиства на жени.
Во 2021 година, Турција се повлече од Конвенцијата на Советот на Европа за спречување и борба против насилството врз жените, позната како Истанбулска конвенција, која бара од властите да го истражат и казнуваат насилството врз жените.
