ЗА ЧЕТИРИ ДЕНА: ЕСМ купи струја за над 1,6 милиони евра
ЕСМ за четири дена во текот на октомври купил електрична енергија од приватни снабдувачи за околу 1,66 милиони евра, покажуваат резултатите од јавните повици за минатиот месец.
Се купувала електрична енергија за потребите на универзалниот снабдувач во деновите на 14-ти, 15-ти, 17-ти и 18-ти октомври, а биле прифатени понуди на осум оператори, а цените достигнувале и до 160 евра од мегаватчас.
Данске Комодитис наплатил најмногу – 514.000 евра, а ГЕН-И следува со 451.000 евра. ЕТМТ е на третото место со 250.000 евра. Купувана била струја уште и од Енерџи Фајненсинг Тим, ХСЕ Мак Енерџи, Соле 24, Универзал Енерџи и Дуферко.
Раководството на РЕК Битола непосредно пред отпочнувањето на грејната сезона нагласи дека ремонтите на блоковите 1 и 2 се завршени и дека до крајот на месецот сите три блокови ќе бидат во погон.
ЕСМ во текот на јули и август купи електрична енергија на слободниот пазар за сума од 7.625.000 евра во летен период кога вообичаено се продаваат вишоци, наместо да се купува увозна струја. Електричната енергија беше купена преку четири повици објавени од ЕСМ Продажба, а се купувало од речиси истите снабдувачи. Купувањето на електрична енергија продолжи и во септември, но со незначителни количини.
Купувањето на електрична енергија е вообичаено за зимските месеци, односно во текот на грејната сезона кога ЕСМ нема доволни произведени количини за да му ги предаде на универзалниот снабдувач на домаќинствата и малите потрошувачи.
АД „Електрани на Северна Македонија“, во текот на минатата година купи електрична енергија од слободниот пазар како надополнување за недоволното производство во висина од 51 милиони евра.
А.К.
