За 6 месеци наплатени 30,9 милиони евра од патарини во Македонија
Според податоците на ЈПДП, во првата половина од 2025 година од патарина се наплатени речиси 1,9 милијарди денари, што е зголемување од 78 милиони денари во однос на истиот период минатата година.
Инаку, Јавното претпријатие за државни патишта (ЈПДП) објави јавен повик за склучување договори со правни лица за продажба, дистрибуција и наплата на патарина со електронски уреди М-ТАГ. Ова следува по последните измени на Законот за јавни патишта, со кои се овозможува проширување на мрежата за достапност на уредите и надвор од просториите на самото претпријатие.
Правните субјекти што ќе бидат избрани ќе имаат обврска да обезбедат микробранови транспондери (ТАГ) што работат на фреквенција од 5,8 GHz, во согласност со европските стандарди. Дополнително, потребен е и веб-базиран апликативен софтвер за активација, следење и управување со уредите, кој мора да биде целосно интегриран со постојниот систем за електронска наплата на патарина.
Директорот на ЈПДП, Коце Трајановски, изјави дека целта на повикот е зголемување на ефикасноста и безбедноста во сообраќајот, намалување на гужвите на наплатните станици и спречување на евентуални злоупотреби.
„Очекуваме дека со проширувањето на мрежата на М-ТАГ уреди, ќе го олесниме патувањето на граѓаните и ќе создадеме поефикасен систем“, додаде Трајановски.
Електронскиот систем за наплата на патарина беше воведен во 2019 година на делови од Коридорите 8 и 10, а моментално е активен и на целосно автоматизирани наплатни станици како Глумово и Желино. Во тек е изработка на проектна документација за воведување на затворен систем на Коридор 8 и реконструкција на станицата Миладиновци.
