ВУЧИЌ ЗА ТРАМП: Aко ја запре војната во Украина, треба да му се подигне споменик
Српскиот претседател Александар Вучиќ, од Светскиот економски форум во Давос изјави дека ако американскиот претседател Доналд Трамп ја запре војната во Украина, треба да му се подигне споменик.
„Чекаме да видиме што ќе направи Трамп, утре да зборуваме тука од Давос. Шолц и Макрон се состануваат денеска, ги подготвуваат своите одговори, има многу проблеми и многу непознати во равенката. Доколку Трамп постигне прекин на огнот во Украина, сите треба му подигнеме споменик, ќе ја спаси цела планета. Господ нека ни е на помош“, рече српскиот претседател.
Пред да дојде на власт, Трамп ветуваше дека ако победи, за 24 часа ќе стави крај на војната во Украина. Тој пред два дена и официјално ја презеде функцијата претседател на САД.
Трамп повтори дека планира да разговара со рускиот претседател Владимир Путин, а не исклучи и стопирање на доствата за оружје кон Украина.
Украинскиот претседател Володимир Зеленски пак, од економскиот форум во Давос повтори дека членството во НАТО е најдобра безбедносна гаранција за неговата земја. Според него, секакво спроведување на мировен план ќе предвидува најмалку 200 илјади мировници од европските земји на украинска територија.
фото Фејсбук/Александар Вучиќ
