ВУЧИЌ: Не можат да го соборат претседателот, бидејќи знаат дека тоа би ги довело во конфликт со армијата

Српските власти за неколку дена очекуваат нови немири. 

Српскиот претседател Александар Вучиќ изјави дека „остануваат уште пет дена до обидот за револуција и уривање на уставниот поредок, што е едно од најтешките кривични дела во Србија“, пренесува N1 Србија.

Според него, главното барање по преземањето на институциите ќе биде формирање некаква преодна влада. 

„Тие не можат да го соборат претседателот, бидејќи знаат дека тоа би ги довело во конфликт со армијата“, вели Вучиќ.

Тој рече дека единствениот план им е да го преземат српскиот парламент и Радио и телевизија на Србија.

Вучиќ рече дека „додека е жив“ нема да прифати никаква преодна влада, дека „ќе мора да го убијат“ и дека тоа е негов завет и дека „нема да ја предаде земјата на измамници“, што беше поздравено со овации и аплаузи.

По несреќата во Нови Сад лани на 1 ноември каде се урна натстрешница и уби 14 луѓе, во Србија има масовни протести. Пред неколку денови имаше судири и фрлање на чадни бомби и во Собранието, каде три пратенички беа повредени. Српскиот претседател претходно тврдеше дека шарената револуција не успеа во Србија.