Вучиќ: Eдинствената цел на Приштина е да ги испровоцира Србите за да се претстават како жртви на „Зеленски“
Единствената цел на Приштина се провокации за да нè вовлечат во војна со НАТО, вели српскиот претседател Александар Вучиќ.
Вучиќ кој со премиерката Ана Брнабиќ и членови на Владата е на средба со Србите од Косово во Рашка, им порача да се почитуваат одлуките што ќе се донесат на средбата и дека единствената цел на Приштина е да ги испровоцира Србите за да се претстават како жртви на „Зеленски“, јави дописникот на МИА од Белград.
„Знам дека донесовте одлука да не учествувате на изборите. Ги повикувам сите во КиМ да се обединат. Повик до сите како што сте донеле одлука така и да се однесувате и да го почитувате тоа“, рече Вучиќ во Рашка.
Тој додаде дека локалните избори во четири општини на северот на Косово значат дека 99 отсто од граѓаните не се прашуваат ништо. Вучиќ иронично изјави дека „претпоставува дека ова е демократија која, ако ја загрозиме, ќе бидеме тирани и ја нарушуваме стабилноста на Балканот“. Тој вели дека косовскиот премиер Албин Курти, инсистира да се одржат избори на северот на Косово, на кои, како што рече, ќе учествуваат партиите на Курти и Тачи, за градоначалниците да бидат од тие партии, а потоа да кажат дека тие општини на север не сакаат да бидат дел од Заедницата на српските општини (ЗСО).
Деновиве косовски полицаец пукал во Србин од Звечан, по што вчера имаше протести на Косово. Тие испратија порака до Европа дека Албанците пукаат во Србите на Косово.
