Вредноста на Хојлунд за година и пол порасна за – 42 пати!
Момчето родено во Копенхаген не дека нешто претерано блесна во дресот на Аталанта, но имаше пристојна сезона со десет гола и четири асистенции, па кога тоа ќе се додаде на неговите 20 години цената на пазарот почна вртоглаво да расте.
Според Фабрицио Романо, Манчестер јунајтед ќе ѝ плати на Аталанта 70 милиони евра плус непозната сума во бонуси, но според „Скај спортс Италија“ отштетата ќе изнесувала 75 милиони евра плус 10 милиони евра на основа на бонуси поврзани со неговите настапи.
Ако ја земеме оваа сума како вистинита, доаѓаме до заклучок, дека ова момче доживеа нереален раст на фудбалската берза само во рок од 18 месеци, од моментот кога ја напушти Данска. На 18 години и 11 месеци замина од Копенхаген во Штурм Грац за 1.95 милион евра, во јануари 2022, за пола година подоцна, Аталанта да плати 17,2 милиони за неговите услуги.
Само една сезона со тимот од Бергамо и шпицот со робусна физиономија (191 сантиметар висок) еруптира, па сега калчолигашот ќе инкасира 500 проценти добивка од тоа што го плати за него, но и 42 пати повеќе од неговата пазарна вредност кога стана интернационалец. Колку и да се важни головите и резултатите, во модерниот фудбал и парите одредуваат колку некој вреди, па Хојлунд ќе биде и тоа како следен во новата сезона за да се процени дали ревносниот напредок е мит или вистина.
