Вработените во „Пошта“ најавуваат штрајк, не добиле одговор од директорот кога ќе добијат февруарска плата!
Синдикалните организации на Македонска Пошта денеска на двочасовен протест ја повикаа Владата да се задолжи за обезбедување финансиски средства за редовна исплата на плата.
Тие бараат и преземање на итни мерки за реформирање и реорганизирање на компанијата.
Додаваат дека доколку не се исполнат барањата на вработените, протестот ќе продолжи понатаму, а ќе отпочнат и постапка за организација на штрајк.
„Повеќе пати разговаравме со новиот директор, но не добивме конкретен одговор кога ќе има исплата на плата. Сведоци сме дека денеска нема плата за работниците, а законскиот рок е до 15-ти во месецот. Моментално се 1800 вработени и околу 200 поштари на договор. Исто така бараме и да се реши статусот на поштарите кои работат за минимална плата и без здравствено осигурување“, вели претседателот на Синдикатот на Македонска пошта, Боро Велигденов.
Тој вели дека 80% од вработените се на минимална плата.
