Вработените на „Пошта“ утре на протест, ќе си ја бараат платата, но и решение за состојбите!
Синдикалните организации на Македонска Пошта со најава за двочасовен протест утре.
Во пишаната изјава од претседателот на Синдикатот, Боро Велигденов се вели дека протестот ќе биде од 08:00 до 10:00 пред Дирекцијата и во сите подружници на националната Пошта, а преку истиот ќе побараат исплата на платата за минатиот месец и решение за состојбата во поштенското претпријатие.
„На протестот вработените ќе го изразат револтот и загриженоста од серизноста на состојбите во која е доведена АД Пошта предизвикани од финансиската криза, крајно лошата организација во работењето, необезбедени услови и средства за работа, а најголемата загриженост и револт кај вработените е предизвикано од грубото непочитување на работничките права од страна на работодавачот. Работодавачот и покрај законската обврска за редовна исплата на плата, не им исплати плата на работниците во законскиот рок до 15-ти во месецот, за февруари 2024 година доведувајќи г до работ на егзистенција и неможност за обезбедување пристоен живот на нивните семејства“, вели Велигденов.
Како што вели, револтот и стравувањата се дотолку поизразени од крајно лошата финансиска состојба на друшвото и неизвесноста за редовна исплата на плата во нареден период .
„Комуникацијата со раководството е на многу ниско ниво, немаат слух за проблемите на своите вработени и не се придржуваат до договорените ставови, права и обврски. Сите досегашни средби со менаџментот не вродија со плод, односно немање спремност за реформирање и реорганизање на друштвот кое е повеќе од потребно, токму затоа принудени од актуелната ситуација, огромната неизвесност за иднината на нашата компанија и зачувување на работните места вработените – членови на синдикатите својот револт и незадоволство ќе го искажат на општ протест“, додава тој.
