Излезни анкети на претседателските избори во Русија: Путин освои 87,8 отсто од гласовите
Во Москва точно во 20 часот по локално време се затворени избирачките места за изборите за претседател на Русија, а според првичните податоци излезноста во главниот град била околу 66 отсто. Гласањето траеше три дена, а гласачите можеа да изберат дали ќе гласаат на традиционален начин, користејќи хартиени гласачки ливчиња или електронски, користејќи електронски терминали за гласање, пренесува РИА.
Централната изборна комисија утре наутро на прес-конференција ќе ги соопшти првите прелиминарни резултати од претседателските избори во Русија.
Изборите за претседател на Русија почнаа во петокот, а завршија денеска.
За функцијата шеф на државата се натпреваруваат четворица кандидати – Леонид Слуцки, Николај Харитонов, Владислав Даванков и Владимир Путин.
Излезни анкети: Путин освои 87,8 отсто од гласовите
Излезните анкети покажуваат дека Владимир Путин освоил огромно мнозинство на претседателските избори во Русија, пренесува „Гардијан“. Според извештаите, анкетите покажуваат дека 87,8 отсто од луѓето гласале за актуелниот претседател.
Путин се кандидираше против тројца кандидати од партиите кои не го критикуваа неговото владеење или инвазијата на Украина.
