„Воздух или смрт“: Струмичани на масовен протест против индустриското загадување и институционалниот молк
Под мотото „Воздух или смрт“, граѓаните на Струмица денеска излегоа на масовен протест, револтирани од алармантното загадување кое го рангираше нивниот град како седми најзагаден во Европа за 2023 година. Струмичани упатија остри пораки до надлежните, обвинувајќи ги за директно соучесништво во уништувањето на здравјето на народот заради бизнис интереси.
Од говорницата беше порачано дека отровниот воздух во градот не е случајност, туку резултат на намерно непостапување на институциите. Учесниците на протестот посочија дека индустриските капацитети од А и Б категорија, како и малите и средни претпријатија, секојдневно испуштаат тешки метали и прашина без соодветни филтри.
„Ова не е грешка, ова е убиство со умисла,“ се слушна на протестот. Беше потенцирано дека одредени компании користат петролкокс – нафтен отпад кој при согорување ослободува исклучително опасни материи. Граѓаните прашаа зошто нема засилена контрола и каде се резултатите од мерењата на емисиите од печките на овие капацитети.
Говорниците упатија тешки обвинувања до надлежните инспекторати и власта, тврдејќи дека законите не се спроведуваат затоа што компаниите-загадувачи донираат, лобираат и вршат притисоци врз носителите на одлуки.
„Загадувањето на воздухот, водата и почвата не е несреќа, тоа е бизнис од лукративни побуди. Овој град им припаѓа на луѓето кои дишат, а дишењето не е луксуз што треба крваво да го платиме, туку основно човеково право“.
Струмичани побараа итна реакција и затворање на сите компании кои ги кршат еколошките правила. Тие порачаа дека борбата за здрава животна средина е борба за нивните деца и родители кои веќе се разболуваат од канцерогениот воздух.
Протестот заврши со силни извици „Воздух!“ и „Сега!“, со јасна порака дека граѓаните нема повеќе да толерираат институционална рамнодушност додека се борат за својот живот.
