Возачот на моторот кој го прегази Југослав на кејот на Вардар призна вина: „Големо сочувство за фамилијата, да можам да сменам нешто, би направил“
Возачот на мотоцикл кој на 1 јули годинава на пешачка патека на кејот на Вардар, во близина на Паркот на франкофонијата, го прегази Југослав Николовски (68), денеска пред Основниот кривичен суд Скопје призна вина.
Дваесет и петгодишниот Фатон Нури пред Судот призна вина за делото „тешки дела против безбедноста на луѓето и имотот во сообраќајот“, додека за делото „неукажување помош на лице повредено во сообраќајна незгода“ ќе се брани и ќе предложи докази.
„Се чувствувам виновен за сообраќајката, која не би сакал да ѝ се случи на никој. Големо сочувство за семејството. Да можев да сменам нешто, би направил. Што се однесува до помошта, давам помош и давам. Да има камери таму… Се изјаснувам дека сум помагал на покојникот и за тоа не се чувствувам виновен“, изјави Нури.
Одбраната побара одложување на денешното рочиште за да се завршат вештачењата и останатите докази, како и да се изведат сведоци за второто дело. Судот ја раздвои постапката: за првото дело, за кое обвинетиот призна вина, рочиштето е закажано за 24 октомври, а за второто дело, судењето ќе продолжи на 11 ноември.
Обвинителката истакна дека обвинителството ќе докаже дека на 1 јули обвинетиот со незаконско управување на мотоцикл без возачка дозвола на пешачка патека предизвикал сообраќајна незгода во која Југослав Николовски се здобил со тешки повреди на кои подоцна им подлегнал.
„Обвинетиот, иако Дедо Љубе лежел облеан во крв, го оставил мотоциклот и го напуштил местото на несреќата. Сопатникот на мотоциклот, иако повреден, останал на местото додека да дојде увидната екипа“, рече обвинителката.
Семејството на починатиот најави барање за оштета, додека сопатникот на моторот не побара отштета и не се приклучува кон кривичниот прогон на обвинетиот.
На 1 јули, Фатон Нури управувал мотоцикл „Кавасаки“ без регистарска табличка по пешачката патека покрај зграда на улицата „Јован Хаџи Константинов – Џинот“. Тој не ја приспособил брзината, управувал без возачка дозвола и на недозволено место, при што левиот страничен дел од мотоциклот удрил во пешакот Југослав Николовски. При ударот, Николовски останал повреден на патеката, а возачот и сопатникот паднале на коловозот. Пешакот се здобил со тешки повреди, поради кои починал наредното утро, додека сопатникот имал полесни повреди. Наместо да им укаже помош, осомничениот го напуштил местото.
