ВОЗАЧИ ПОЧЕКАЈТЕ ЗА ДА ПОЛНИТЕ ГОРИВА – по полноќ нови пониски цени, РКЕ со нова одлука

Горивата имаат нови цени по денешната одлука на Регулаторната комисија за енергетика, водни услуги и услуги за управување со комунален отпад на Република
Северна Македонија. 

Овој пат РКЕ донесе Одлука со која се врши намалување на малопродажните цени на нафтените
деривати во просек за 2,10 проценти во однос на претходната одлука.

– Референтните цени на нафтените деривати на светскиот пазар во споредба со претходната пресметка
бележат намалување во просек: кај бензините за 4,069 отсто, кај дизелот за 3,550 проценти, кај екстра лесното масло
е за 3,449 отсто и кај мазутот намалувањето е за 3,527 проценти.
Курсот на денарот во однос на доларот во изминатиот период по кој беа формирани цените со претходната
пресметка е понизок за 0,0892 отсто – појаснуваат од комисијата во соопштението. 

Воедно од РКЕ посочуваат дека малопродажните цени на бензините Еуросупер БС-95 и Еуросупер БС-98, како и на Еуродизел (Д-Е V) и на Екстра лесното масло за домаќинство на (ЕЛ-1) се намалуваат за 1,50 денари за литар. Малопродажната цена на Мазутот М-1 НС се намалува за 1,226 денари за килограм. 

– Напоменуваме дека ова се максималните цени на нафтените деривати од 00:01 часот на 4.3.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени – се укажува во соопштението. 

По полноќ највисоките цени по кои ќе можат да се продаваат нафтените деривати ќе изнесуваат:
М

– Еуросупер БС – 95 по цена од 77,50 денари за литар

– Еуросупер БС – 98 ќе чини 79,50 денари за литар

– Еуродизел БС (Д-Е V) ќе се продава за 72 денари за литар

– Екстра лесно масло 1 (ЕЛ-1) ќе чини 71,50 денари за литар

– Мазут М-1 НС ќе чини 44,952 денари за килограм.