Володимир Зеленски сè уште ја гледа Украина во НАТО, и покрај војната
Украинскиот претседател Володимир Зеленски изјави дека сè уште ја гледа неговата земја на патот кон влез во НАТО, иако руската агресивна војна не покажува знаци на крај по 13 месеци борби, јави ДПА.
Оваа недела е забележан добар „потег кон НАТО“, што се изразува со нова воена помош од Запад и други манифестации на меѓународна поддршка, рече Зеленски во вечерното видео обраќање од Киев.
Зеленски го изјави ова по повод предлогот на Литванија да ја покани Украина да стане членка на НАТО на самитот на Алијансата во Вилнус во јули. Тој и се заблагодари на Литванија.
Обидот на Украина да се приклучи на НАТО често се наведува од Кремљ како една од причините за целосната инвазија на Русија на земјата во февруари 2022 година.
Минатата година Зеленски се залагаше за „побрзано“ пристапување на Украина во НАТО, надевајќи се на повластен третман. САД и другите земји-членки на НАТО, како што е Германија, изразија резерви по ова прашање, бидејќи еден од предусловите за влез во алијансата е земјата-кандидат да не учествува во меѓународни конфликти.
