Во трагедијата на „Партизанска“ загина 22-годишната дизајнерка Фросина

Скопје беше потресено од голема трагедија доцна синоќа, кога на булеварот „Партизанска“ животот го загуби 22-годишната дизајнерка Фросина Кулакова од Неготино. Во несреќата учествувал автомобил управуван од 20-годишно момче, кое ја удрило младата девојка, а од здобиените повреди таа починала на самото место.

Тажната вест брзо се прошири низ нејзиниот роден град, оставајќи ги граѓаните во шок и неверување. Многумина со загриженост прашуваат до кога ќе трае црниот биланс на жртви на нашите улици и колку уште невини животи треба да бидат изгубени пред да се преземат построги мерки во сообраќајот. Барањата за построги казни и законски измени повторно се актуелизираа по оваа трагедија.

Фросина пред само седум месеци го воодушеви модниот свет со своите креации на годишната ревија на Интернационалниот институт за мода „Изет Цури“, каде што студираше. Нејзини пријатели, колеги и сограѓани споделуваат емотивни пораки и сочувство со нејзиното семејство, изразувајќи болка за прерано згаснатиот млад живот.

Јавноста ја памети и од нејзиното детство, кога пред 12 години, како десетгодишно девојче, се појави во видео записот за песната „Божиќ за секој од нас“ заедно со својата сестра Росица и Димитар – дуото што ѝ го донесе на Македонија петтото место на Детската Евровизија во 2007 година со песната „Динг, динг, донг“. Тогаш, со својата насмевка и енергија, ги освои симпатиите на гледачите.

Нејзината трагична смрт остава голема празнина, а повиците за подобрување на безбедноста во сообраќајот стануваат сè погласни.

Целиот текст прочитајте го на Фокус со клик ТУКА.