Во Тетово уривање на потпорни ѕидови и локални излевања по дождот
Обилните врнежи од дожд предизвикаа сериозни проблеми во повеќе региони во земјата, при што се поплавени подруми, дворови, делови од инфраструктурата и земјоделски површини, информира Центарот за управување со кризи (ЦУК).
Во Охрид и околината поплавени се подрумски простории, дворови и неколку објекти, а излеани се дел од водотеците. Локалната самоуправа и кризниот штаб се на терен, додека екипите на ЈП „Водовод“, „Нискоградба“ и „Комуналец“ интервенираат со отстранување на водата и санација на поплавените места.
Слични проблеми се регистрирани и во Кичево и околните населби, каде што во подрумските простории и на дел од површините навлегла вода. Дел од граѓаните се евакуирани и сместени во привремени објекти со обезбедена храна и здравствена заштита. Поплавена е дел од земјоделската површина и неколку локални водотеци. Општината и Црвениот крст Кичево обезбедуваат сместување, храна и лекови за погодените, а ЈП „Комуналец“ и екипи на итната медицинска помош интервенцијата ја извршуваат на терен.
Во регионот на Битола зголемените водостоји на локалните реки предизвикаа локални излевања и поплави на куќи, дворови и земјоделски површини. Кризниот штаб ги организира активностите за приоритетна санација, додека механизацијата на општините работи на терен.
Во Тетово и околината регистрирани се пријави за уривање потпорни ѕидови и локални излевања на водотеци. Полициски екипи вршат увид на местата, а механизацијата на општината интервенира со чистење и санација на штетите.
Поплави се регистрирани и во Гостивар и околните населени места, каде што водата поплавила локални патни правци и дел од инфраструктурата. Екипите на ЈП „Комуналец“ работат на расчистување, а механизацијата од Водостопанство е ангажирана за чистење на свлечишта и отстранување на последиците.
ЦУК најавува дека состојбата продолжува да се следи и дека екипите на локалните самоуправи и службите се на терен.
