Во Швајцарија референдум за „опстанок“ на монетите и банкнотите
Дали швајцарските франци, во форма на монети и хартиени банкноти, треба да бидат заштитени со Уставот, поради се посилните глобални притисоци за „дигитализирање“ на финансиските трансакции? Поради оваа дилема, невладината организација со слободарски ориентации наречена Швајцарско движење за слобода (ФБС) минатата недела собра 157.422 потписи за да организира референдум за понатамошната судбина на „хартиените франци“, објави денеска „Блумберг“. Според швајцарските закони, доколку иницијативата добие 100.000 потписи од граѓаните на таа земја, референдумот за поставената тема станува задолжителен.
Швајцарската државна агенција за надзор на финансиските трансакции наведува дека Швајцарците минатата година извршиле 29 отсто од сите плаќања во готово (во Велика Британија околу 15 отсто, во Шведска осум отсто, додека во Норвешка „картичката“ била уфрлена во 96 проценти од случаите за порамнување сметки).
Инаку, пред короната, плаќањата во готовина беа многу почести од денес (48 отсто во Швајцарија). Едно од објаснувањата за ова е поврзано со некогаш широко распространетиот страв дека и книжните пари го „пренесуваат“ вирусот.
„Укинувањето на готовината не е само заради транспарентност, леснотија на плаќање или безбедност… тоа носи и голема опасност од тоталитарно надгледување“, вели Ричард Колер, претседател на Швајцарското движење за слобода.
Во меѓувреме, ниту владата во Берн, ниту Централната банка на Швајцарија не истакнаа иницијатива за неизбежно укинување на хартиените банкноти.
