Во Полска уапсена Украинка осудена за продажба на 56 бубрези
Полски граничари уапсиле Украинка осудена на 12 години затвор во Казахстан за учество во криминална група која тргувала со човечки органи и продавала 56 бубрези, јавува Ројтерс.
35-годишната жена, идентификувана како Ксенија П. според полските закони за приватност, била приведена на железнички премин меѓу Полска и Украина по црвена потерница од Интерпол, изјави Марта Петковска, портпаролка на обвинителството во Пшемишл.
Обвинителите не објаснија зошто жената не била во затвор во Казахстан во моментот кога била запрена на граничниот премин, ниту кога била осудена.
Интерпол распишал потерница по уапсената
Интерпол издаде црвена потерница по неа во ноември 2020 година, соопштија обвинителите. Станува збор за меѓународно барање до полициските служби ширум светот за привремено апсење на лице кое чека екстрадиција или некоја слична законска процедура. Жената е осудена за учество во меѓународна организирана криминална група која незаконски набавувала човечки органи и ткива и ги продавала на црниот пазар од 2017 до 2019 година, објасни Петковска.
Таа, исто така, беше прогласена за виновна за нелегална трговија со бубрези на најмалку 56 жртви од Казахстан, Ерменија, Азербејџан, Украина, Киргистан, Таџикистан, Узбекистан и Тајланд. Таа тргувала со органи за профит, а криминалните активности ги претворила во постојан извор на приход.
Обвинителството до судот поднесе барање за нејзин привремен притвор во траење од една недела за да се подготви постапката за екстрадиција во Казахстан.
