Во петок ќе се протестира во Тетово против крстот на Попова Шапка
За во петок е најавен протест пред Општина Тетово.
Протестот е против крстот на Попова Шапка, за кој вчера првиот човек на Општинскиот инспекторат во општина Тетово Садат Сулејмани истакна дека има одлука за отстранување.
Тој вели дека има одлука да го урне крстот заедно со 5.000 други објекти, без да прецизира кога точно тоа ќе се случи.
„За крстот има одлука за уривање. Кога ќе се отстрани? Во Тетово има над 5.000 решенија за уривање. Гледате дека се трудиме да работиме. Кога ќе дојде време, ќе го направиме тоа“, вели Садат Сулејман, началник на општинскиот инспекторат во Тетово.
Утрово пак следеше реакција и од директорот на Центарот за управување со кризи, и претседател на партијата „Достоинство“, Стојанче Ангелов.
Тој порача дека крстот нема да падне.
„Првиот човек на Општинскиот инспекторат во Тетово Садат Сулејмани изјавил дека е донесена одлука за уривање на крстот во дворот на црквата на Попова Шапка но веднаш дополнил дека во Тетово има над 5.000 решенија за уривање на различни објекти и дека крстот ќе биде отстранет тогаш кога ќе му дојде ред. Со оглед на досегашната динамика на рушење на бесправно изградени објекти во Тетово и тетовско, крстот на Попова Шапка никогаш нема да дојде на ред. Во меѓувреме, за граѓаните на Тетово, далеку покорисно би било кога градоначалникот Касами наместо со крстот на Попова Шапка би се зафатил со чистење на натрупаното ѓубре низ градот. Да живееш под преубава планина а да дишеш отров е парадокс од невидени размери. Затоа наредната работа која му ја препорачувам на градоначалникот Касами е да се зафати со барање долгорочно решение за надминување на штетите и опасностите од загадениот и канцероген воздух кој секојдневно го дишат жителите на овој регион“, вели Ангелов.
Тој додава и дека најавениот протест против крстот на Попова Шапка кој треба да се одржи во очи на Нова година, во петок во Тетово, меѓу другото ќе покаже колкумина наши сограѓани Албанци ќе покажат непочит кон нас православните Македонци.
„Се надевам дека нивниот број ќе биде мал“, порача Ангелов.
