„ВО ХРВАТСКА СЕ СЀ НАПЛАЌА, ДУРИ И ТУШОТ НА ПЛАЖА“: Сместувањето рипна на 90 евра од ноќевање, сезоната се уште не е започната, а многумина предвидуваат пропаст
Хрватското крајбрежје е многу популарно, како за нашите туристи, така и за „подалечните земји“. Чесите се меѓу најбројните во последните години. Сепак, цените годинава многу „скокнаа“, а многу од нив се откажуваат од патувањето до оваа дестинација.
Чесите решија годинава попрво да изберат одмор во Италија отколку во оваа јадранска земја, токму поради цените на сместувањето и генерално цените во угостителските објекти, пишуваше изминативе денови чешкиот портал iDnes.
Една од главните причини зошто Чесите ги ограничија своите патувања до Јадранот беше забележително зголемување на цената на услугите, вклучително и воведувањето на такси за туширање на плажа.
– Претпоставувам дека сегашниот масовен туризам на Чешка постепено ќе се пресели на друго место – изјави експертот за туризам Станислав Зима и додаде дека Чесите претпочитаат да ја изберат соседна Италија, како и Египет.
Традиционалните и омилени гости во Хрватска, според официјалните податоци на чешкиот државен завод за статистика, пристигнале на Јадранот во нешто помал број од вообичаено.
Според овие податоци, од Чешка има 30.000 туристи помалку од лани. Оваа бројка е загрижувачка бидејќи 2023 година беше рекордна по бројот на туристи од Чешка кои решија својот одмор од најмалку четири дена да го поминат во Хрватска.
Незадоволни се и Германците
Имено, два германски медиуми ТЗ и Меркур наведуваат дека сместувањето за туристи во Хрватска поскапело за 30 отсто. Според претседателката на Хрватското здружение за семејно сместување, Барбара Марковиќ, Хрватска е за 25 отсто поскапа од конкуренцијата, не само за ноќевања, туку и за сите други релевантни понуди.
– Хрватска сега е поскапа од Шпанија и Грција, а цените секој ден се повисоки – рече Марковиќ.
Туристите се се понезадоволни од цените на храната, а се жалат и на цените на лежалките кои можат да чинат и до 40 евра.
– Десет невкусни ќебапи, грст замрзнато месо и мало пиво ме чинат нешто помалку од 25 евра. Сметката ја заокружив на 25 евра, но дебелата сума навистина ми беше тешко да стомам – изјави туристката од Виена, прецизирајќи дека за ќебапи платила 17,50 евра, а за пиво 7 евра.
– Нема повеќе да одам на одмор овде – рекол еден германски турист.
Хотелите го презедоа водството во покачувањето на цените, па некои од нив поскапеа и за 40 отсто во споредба со 2021 година. Како што објави „Вечерњи лист“ лани, ноќевањата биле 80, а често и 90 евра дневно.
