Во Грција за четири часа се подметнати девет пожари

Во една област во Грција има подметнато девет пожари за четири часа. Тоа се пожари во областа Авлона, во северното подножје на планина кај Атина.

Грчките пожарникари се борат со неколку пожари, на североистокот на Грција и на периферијата на главниот град Атина.

Во пожарите минатата недела загинаа 20 луѓе, меѓу кои и две момчиња на возраст од 10 до 15 години, а властите веруваат дека жртвите се бегалци кои дошле од Турција, пренесува АП. Нивните тела се пронајдени во близина на кабина во опожарена шумска област во североисточна Грција.

„Досега во битката со огнената стихија се повредени 60 пожарникари“, потврди портпаролот на противпожарната служба Јоанис Артопиос.

Пожарите беснеат и во други делови на Европа, но на островот Тенерифе во шпанскиот архипелаг Канар, во северозападна Турција во близина на границата со Грција, во Португалија и во Италија, пожарите се под контрола, соопштија властите.

Грчкиот министер за климатски кризи и цивилна заштита Василис Кикилијас изјави дека некои пожари во близина на Атина се намерно предизвикани.

„Некои пиромани палат пожари, загрозуваат шуми, имоти и пред се човечки животи. Ова што се случува не само што е неприфатливо, туку е одвратно злосторство“, рече Кикилијас во изјава за грчката телевизија. 

Грција скоро секое лето се бори со големи шумски пожари.