Во центарот на италијански град осамнаа југословенски знамиња! – Mногубројни негативни реакции: „Одвратен гест на провокатор“

Во саботата вечерта, на 29 март, на прозорците на зградата на улицата Корсо Верди, во центарот на Горица, Италија, се појавија југословенски знамиња со црвена ѕвезда. Знамињата беа закачени на прозорците на првиот кат од зградата која се наоѓа веднаш до градскиот парк.

Авторите на иницијативата првично беа непознати, а самиот чин предизвика бројни негативни реакции кај граѓаните и брза осуда од градските власти, пишува Радио Каподистрија.

Градската управа остро го осуди настанот, нарекувајќи го „беден гест“ и ги обвини непознатите сторители за величање на еден од историските тоталитаризми.

„Кои и да се провокаторите, тие се разоткрија“, велат од Градот.

Иако на почетокот не се знаеше кој стои зад акцијата, 24 часа подоцна беше откриено дека станува збор за иницијатива на здружението за промоција на општествените активности „Агоре“, кое функционира токму во тој објект и организира изложби и настани.

„Решивме да ги поставиме знамињата по повод затворањето на нашата последна изложба“, изјавија тие за дневниот весник „Ил Пиколо“.

„Далеку од славење на тој историски период – се работи за филолошка реконструкција, ако навистина сакате, уметнички чин“, додаваат тие.

Нивното објаснување не беше доволно за да се запре бранот полемики, особено во контекст на чувствителната политичка клима во Горица, град кој во последните месеци беше во фокусот на медиумите не само поради титулата Европска престолнина на културата (GO!2025), туку и поради низата контроверзии. Меѓу нив се одбивањето да му се одземе почесното државјанство на Мусолини, дискусиите за натписот „Тито“ на ридот Саботино, како и прославите поврзани со фашистичката единица X MAS.

Во овој контекст, многумина ја доживеаја изложбата на знамето како наивна, па дури и неискрена провокација.

„Можеби некој би можел да каже дека се корисни идиоти, но не, тие се едноставно идиоти“, напиша на социјалните мрежи Liga Nazionale од Горица.