Во БИХ покренат процес за укинување на данокот за купување прва недвижнина
Министерот за финансии и трезор на Босна и Херцеговина Срѓан Амиџиќ изјави дека е започнат процес за донесување на законот за укинување на ДДВ при купувањето на првиот недвижен имот на државно ниво.
На прес-конференција во Сараево, Амиџиќ изјави дека ова е важна иницијатива за луѓето кои живеат во БиХ и дека е оправдана од социјален аспект поради драстичното зголемување на цените на недвижностите и дека една од главните причини за напуштањето на младите на државата е неможноста да се реши станбеното прашање.
Тој оцени дека политичката ситуација во Босна и Херцеговина е созреана, така што таквиот предлог ќе добие поддршка во Парламентарното собрание на Босна и Херцеговина.
Тој објасни дека е важно укинувањето на ДДВ за првиот недвижен имот, бидејќи поради зголемените цени на станбената градба, граѓаните тешко купуваат недвижен имот.
Тој нагласи дека нема да има поделба и дека сите граѓани на БиХ кои ќе го купат својот прв недвижен имот ќе бидат ослободени од плаќање ДДВ.
„Нема поделба, не се однесува само на млади брачни парови до 35 години или деца на паднати војници, туку се однесува на сите кои живеат во БиХ, имаат државјанство на БиХ и немаат решено станбено прашање. “, истакна Амиџиќ.
Претставничката во Претставничкиот дом на Парламентарното собрание на БиХ, Миа Карамехиќ-Абазовиќ прецизираше дека во иднина граѓаните ќе заштедат 17.000 KM (околу 8.500 евра) за секои 100.000 KM (околу 50.000 евра) за првиот имот, што значително ќе го намали товарот на тоа купување.
Премиерот на кантонот Сараево Нихад Ук истакна дека владејачката коалиција на државно ниво договорила конкретна мерка, од која цела БиХ ќе има корист.
