Внатрепартиска трка во Алијанса за Албанците

Лидерот на Алијанса за Албанците Таравари и неговите поддржувачи утревечер во Куманово на заседание на централното претседателство. Од таборот на Села пак велат дека тоа е само собир и состанок. Партиското собрание е закажано за в сабота во Скопје. Тогаш треба да падне конечната одлука дали Алијанса за Албанците ќе настапи самостојно на парламентарните избори за што се залага Села, или пак партијата ќе биде дел од коалицијата на Европскиот фронт за промени, на што инсистира Таравари.

„Дел од членовите на собранието во текот на вчерашниот ден добија порака за средба во Куманово, а потоа и за средба со господинот Таравари. Она што сакаме да ве известиме е дека никој не треба да подлегне на дезинформации дека се одржува партиско собрание, бидејќи како што ќе заклучите од поканата, станува збор за собир и состанок. Партиското собрание, согласно статутот на партијата, е закажано за в сабота во Буши ресорт во 13 часот“, стои во дописот од Алијанса за Албанците.

Во меѓувреме, комбинаторики и за учеството на министрите од партијата во техничката Влада. Алиу и Меџити, кои го поддржуваат Таравари не се откажуваат од министерското столче. Откако беа сменети кадри од третиот ешалон на владина седница, се погласни се најавите и за предлог за нивно разрешување. Тоа го побара и кадровската комисија. Неофицијално во игра и нивните заменици. Се споменуваат Недим Бајрами како можен наследник на Алиу во информатичко општество и администрација и Илир Демири во здравство, на местото на Меџити. Лидерот на СДСМ Ковачевски директно не ги коментира случувањата во Алијанса за Албанците, но рече дека внатрешните прашања се решаваат во самата партија. Со идентичен став и евроамбасадорот во земјава, Дејвид Гир.

Поделбата на табори во Алијанса за Албанците која има 8 пратеници се отслика и на собраниската седница. На парламентарното мнозинство му требаа речиси два часа за да обезбеди кворум, бидејќи пратениците од ВМРО-ДПМНЕ и коалицијата не влегуваа во салата.

Милчо Велески