ВМРО Фракција со осуда за узурпирањето на правото на слобода на говор и сеење на омраза и нетрпеливост од страна на директорот на Канал 5
ВМРО Фракција испрати соопштение во врска со синоќешниот скандал на Канал 5 телевизија.
Според нив, директорот на телевизијата Иван Мирчевски, на најбрутален начин од емисија го избрка гостинот Исмет Рамадани.
„Фракцијата за ревитализација и демократизација на ВМРО-ДПМНЕ, најостро го осудува узурпирањето на правото на слобода на говор и сеење на омраза и нетрпеливост од страна на директорот на телевизијата, кон гостинот во програма кој самата телевизија го поканила.
Овој скандалозен настан, на кој му претходеше националистичка реторика од страна на Биљал Касами, коалициониот партнер на Мицкоски, во врска со изведувањето на македонската химна во училиштата, не се ништо друго туку однапред договорени акти за подигање на меѓуетничка тензија во пресрет на претстојните претседателски и парламентарни избори и дефокисирање на македонските граѓани од уставните измени како пат кон започнување на преговорите на Македонија за членство во ЕУ.
Искрено жалиме поради фактот што Канал 5 како телевизиска куќа со национална фреквенција, преку својот уредник, одбра да биде средство за политички калкулации на Мицкоски, во насока на подигнување на меѓуетничките тензии во Македонија. Наместо поигрување со чувствата на граѓаните, сметаме дека многу поцелисходно би било, уредничкиот тим на оваа телевизија да се позанимава со јавното признание на некогашниот министер за финансии Борис Стојменов за раскрчмувањето на средства на граѓаните, на лица блиски до Мицкоски, на кои „од ракав“ им се давале неповратни кредити за купување на недвижнини и олимписки села, како и тесните врски на сопственикот на оваа телевизија со насадениот таканаречен „лидер“ на ВМРО-ДПМНЕ денес, или барем да се позанимава со тешката меѓународна изолираност на нелегитимното раководство на ВМРО – ДПМНЕ, кое буквално е одстрането од сите политичко процеси во земјава. При тоа, партијата е дефакторизирана и во билатералните односите со скоро сите земјите членки на ЕУ.
Фракцијата за ревитализација и демократизација на ВМРО-ДПМНЕ го повикува членството на партијата, да не подлегнува на веќе прочитаните „маалски финти“ на Мицкоски, кои си поигруваат со меѓуетничките односи во земјата, бидејќи последиците од таквите „политики“ на неизживеан тинејџер ги чувствуваме до ден денешен.
ВМРО -ДПМНЕ беше, а по заминувањето на Мицкоски, повторно ќе биде партија која се грижи за напредокот и благосостојбата на сите граѓани на Македонија, без разлика на нивната верска, национална и секаква друга припадност“, велат од ВМРО Фракција.
