ВМРО-ДПМНЕ: СДС мора да расчисти со Филипче ако сака да се реформира и да биде релевантен политички субјект во земјава
Од владејачката ВМРО-ДПМНЕ преку соопштение велат дека се разобличуваат скандалите од времето кога СДСМ беше власт.
Како што велат, сето тоа е показател за структурниот хаос, распаднатите институции и неодговорноста на СДСМ.
„Случајот со стоковите резерви е само уште едно потсетување дека институциите под контрола на СДС функционирале само како импровизирани конструкции без механизми за одговорност.
Отписот на 2000 тони пченица и јачмен од стоковите резерви, преку Трајан Димковски, тогашен заменик министер за земјоделство, па потоа истите количини најверојатно завршувале на црниот пазар во соседна држава, алудираат дека ова е организирана злоупотреба од страна на тогашната власт.
И покрај укажувањата дека пченицата постоела и била употреблива, направен е записник што го тврди спротивното, т.е документ со контрадикции, кој сепак е прифатен на владина седница.
Тоа значи дека Заев, Николовски и актуелниот претседател на СДС во опозиција, Венко Филипче, како дел од тогашната владина структура, формално легитимирале документ што не кореспондирал со фактичката состојба на терен.
А сега Филипче, преку развлечени прес излагања се обидува да се позиционира како опозициски коректив?
Не може некој кој лично учествувал во систем што дозволил вакви пропусти да биде коректив.
Ако СДС има намера да се реформира и да стане релевантен политички субјект во земјава, мора да покаже зрелост и да се огради од сите функционери на минатата власт.
Тоа подразбира дистанца од Заев, Николовски, а и од Филипче, бидејќи тоа се фигури кои го спречуваат секој обид за вистински реформи во партијата“, велат од ВМРО-ДПМНЕ.
