ВМРО-ДПМНЕ: „Ахмети и ДУИ се српски мафијаши од Али-експрес, од овчари станаа шеици, ќе завршат во затвор!“
Владејачката ВМРО-ДПМНЕ денеска излезе со остра и досега невидено директна реакција на последните изјави на лидерот на ДУИ, Али Ахмети, обвинувајќи го него и неговата партија за огромен криминал, споредувајќи ги со „криминалците на Милошевиќ“ и порачувајќи им дека наместо да ја делат државата, може да завршат зад решетки.
Во соопштението испратено од партискиот центар за комуникации, ВМРО-ДПМНЕ вели дека ДУИ е во очај штом Ахмети се навраќа на конфликтот од 2001 година, иако 23 од последните 24 години бил на власт и е директен учесник во „газењето, компромитирањето и корумпирањето на институциите“.
„Сега после 23 години власт му текна да зборува за 2001 година, конфликт чии бенефити и материјализирање најдобро го осетија 50-тина луѓе од врвот на ДУИ, кои од овчари, земјоделци, механичари и слаткари станаа шеици и тајкуни“, стои во реакцијата, каде се додава дека тоа го постигнале преку постојани закани и злоупотреба на етнички теми кога требало да се зборува за реформи и борба против корупција.
Од ВМРО-ДПМНЕ испраќаат директна закана до партијата на Ахмети: „ДУИ може колку сака да потсетува на 2001, сега сме 2025, и не само што не може да ја делат Македонија, туку може и да завршат во затвор за криминал и за тоа што ја разјадуваат Македонија и ги злоупотребуваат пред сè своите гласачи.“
Владејачката партија понатаму тврди дека за време на владеењето на ДУИ се случил огромен егзодус, особено на Албанците, оставајќи ја земјата „сиромашна, опљачкана и празна“. Според нив, без да зборува за теми од минатото, Ахмети „станува безначаен, празен и гол, при што лесно се гледа неговото вистинско корумпирано лице“.
Во најбруталниот дел од соопштението, ВМРО-ДПМНЕ повлекува паралела помеѓу раководството на ДУИ и српските профитери од времето на Слободан Милошевиќ.
„Очигледно српското влијание во ДУИ е непобитно. Голем мерак имаат да бидат како оние српски скороевичи кои се збогатија на грбот на српскиот народ во време на Милошевиќ… Нашиве српски мафијаши од ДУИ се одраз во огледало на милошевиќевите криминалци, но огледалото во кое се огледуваат тие е од Али-експрес и затоа делуваат трагикомично“, заклучува ВМРО-ДПМНЕ.
