ВМРО-ДПМНЕ ја обвинува власта: Филипче пуштал модуларни болници од леснозапалив материјал и профитирал 20%
Центарот за комуникации на ВМРО-ДПМНЕ денеска објави сериозни обвинувања против министерот за здравство Венко Филипче, поврзувајќи го со аферата „Провизиите кои чинат животи“.
Според партијата, Филипче незаконски пуштал во употреба модуларни болници направени од леснозапалив материјал, при што наводно профитирал дополнителни 20% од договорената сума. Како резултат на ова, настанал пожар во модуларната болница во Тетово, каде загинаа 14 пациенти.
ВМРО-ДПМНЕ тврди дека овие болници биле изградени во време на пандемијата од коронавирусот, без да бидат исполнети законските услови за градење и без почитување на минималните технички стандарди за заштита од пожари. Ниту една од овие болници немала одобрение за употреба, а многу директори од болниците одбивале да ги примат токму поради овие недостатоци.
Обвинителите на ВМРО-ДПМНЕ истакнуваат дека Филипче по трагедијата со пожарот, склучил анекс на договорот со изведувачот, со кој ја зголемил цената за 20%, што било спротивно на основниот договор и законите.
„Дали пожарот во Тетово е последица на тие 20% профит и каде завршиле тие пари? Јавноста мора да ја дознае вистината за модуларната болница“, се вели во соопштението.
